სასტუმრო მენეჯმენტი

თემა I

შესავალი,  სასტუმროს ინდუსტრიის მიმოხილვა

ქვეყნის შიგნით არსებული ცხოვრების სტილი, მოდის თუ ბიზნეს ტენდენციები და მიმდინარეობები,  სხვა ბიზნესების მსგავსად, სასტუმროების აგებულებაზე, დიზაინსა და ტიპზე ერთნაირად მოქმედებს. განსაკუთრებული გავლენა აქვს ქვეყნის დემოგრაფიულ მდგომარეობას - რაც უფრო მაღალია შობადობა, მით უფრო იზრდება ადგილობრივი პოპულაცია და, შესაბამისად, დიდი მოთხოვნილებაა დასასვენებელ ადგილებსა და კურორტებზე. სასტუმრო საქმეზე თავის კვალს აჩნევს ტექნოლოგიებიც. კომპიუტერიზირებულმა სისტემებმა გაადვილა შრომა და გაამარტივა სასტუმროების მართვა. ბოლო დროს, მსოფლიოს მოსახლეობის უდიდესი ნაწილისთვის ხელმისაწვდომი გახდა უკანასკნელი სიახლეები და გაადვილდა მოგზაურობა. მოგზაურობისადმი ადამიანების დამოკიდებულებასთან ერთად იცვლება სასტუმროების მენეჯმენტი და კლიენტებისათვის შესათავაზებელი მომსახურებების სახეებიც. სულ უფრო და უფრო მეტი სასტუმრო და რესტორანი ნერგავს სრულიად ახალ მენეჯერულ ტექნოლოგიებსა და სტრატეგიებს და თავაზობს თავის მომხმარებლებს მხოლოდ მათთან არსებულ უნიკალური ხასიათის მომსახურებებს. 

სასტუმრო ინდუსტრიის განვითარების პროცესი

ყოველი მორიგი სასტუმროს მშენებლობისას ჩნდება შემდეგი კითხვები:

·         რატომ აირჩიეს მაინცდამაინც ეს ადგილი მშენებლობისთვის?

·         ვინ აშენებს სასტუმროს?

·         ვისი საკუთრება იქნება ის?

·         საიდან მოიტანეს სასტუმროს ასაშენებელი ფული?

·         როდის გაჩნდა სასტუმროს გახსნის იდეა და რამდენ ხანში გაიხსნება ის?

·         ვინ არჩევს არქიტექტორს, მშენებელს და დიზაინერს?

·         ვინ უწევს კოორდინაციას სასტუმროს მშენებლობისას წარმოშობილ უამრავ დეტალს?

·         ვინ იქნება უკვე აშენებეული სასტუმროს მენეჯერი?

როგორც წესი, სასტუმროს მშენებლობის იდეა დეველოპერული კომპანიისგან მოდის. ბიზნესის სტრუქტურის განსაზღვრის შემდეგ, დეველოპერი ხშირად რისკავს და საკუთარ ქონებას დებს სასტუმროსთან დაკავშირებულ ამა თუ იმ საინტერესო პროექტში.

სასტუმროს მშენებლობის პროცესი ასე იწყება: დეველოპერები უკავშირდებიან უძრავი ქონების სააგენტოებს და მათი დახმარებით ეძებენ სასტუმროსთვის შესაფერის ადგილებს. ადგილის ფართობი და მდებარეობა სასტუმროს ტიპზეა დამოკიდებული და რასაკვირველია, ამ მიწაზე სასტუმროს მშენებლობის უფლება, მასთან მიმავალი გზა და კომუნალური სისტემები უნდა არსებობდეს. სააგენტოები დეველოპერს შესაფერისი წინადადებების ნუსხასთან ერთად წარუდგენენ ადგილების რუქებს, ფოტოსურათებსა და სხვ. აუცილებელ დოკუმენტაციას. 

სასტუმროს მშენებლობის ადგილის შერჩევისას დეველოპერები მშენებლობის ადგილის მიმდებარე ტერიტორიას 7 კილომეტრის რადიუსში იკვლევენ - ვინ სახლობს, რა გარემოში მოუწევთ სტუმრებს ცხოვრება და როგორია არსებული ინფრასტრუქტურა. 

მნიშვნელოვანია კვადრატული მიწის ღირებულებაც - რაც უფრო მაღალია მიწის ფასი, მით უფრო მაღალი კლასის და ძვირიანი უნდა იყოს სასტუმრო.

დეველოპერის მიერ ადგილის შერჩევის შემდეგ პროექტის მიზანშეწონილობის ანალიზი კეთდება მიუკერძოებელი მესამე მხარის მიერ. მიზანშეწონილობის ანალიზს დეველოპერები უკვეთავენ შესაბამის კომპანიებს ან კონსულტანტთა ჯგუფებს. მშენებლობის მიზანშეწონილობის შესწავლას ხშირად რამდენიმე თვე ჭირდება და ექსპერტთა დასკვნა სხვადასხვა საკითხებთან დაკავშირებულ შემდეგ მონაცემებს შეიცავს:

ადგილმდებარეობა

·         ზონა;

·         ფართობი;

·         მანძილი მთავარი მაგისტრალიდან;

·         მისასვლელი გზები;

·         წვდომა აეროპირტიდან, ქალაქის ცენტრიდან, რკინიგზის სადგურიდან და ა.შ.;

·         ტრანსპორტის მოძრაობის სქემა;

·         მანძილი პოტენციური სტუმრების საცხოვრებელი ადგილიდან ან სამსახურიდან;

·         მიმდებარე დაწესებულებების და ბიზნეს-ობიექტების განლაგება;

·         გარემოს განვითარების გეგმა;

·         მშენებლობისა და მოღვაწეობის ნებართვების აღების  პროცედურა;

·         ადგილობრივი გადასახადები;

ადგილობრივი ეკონომიკა

·         მსხვილი დამსაქმებლები, სამთავრობო სააგენტოები;

·         თითოეული დამსაქმებლისა და სააგენტოს ბიზნეს-ტენდენციები;

·         სასტუმროს საჭიროებები და მოთხოვნილებები;

·         არსებული მოთხოვნილება დასვენებასა და მოგზაურობაზე;

·         ახლომდებარე ტურისტული ღირშესანიშნაობები;

·         ვიზიტორთა რაოდენობა;

·         სამრეწველო და სამეურნეო გამოფენების, ბაზრობების, კონფერენციების ჩატარების ისტორია.

სასტუმროს ბაზარი

·         კონკურენტები (არსებული და მომავალი);

·         მიმდებარე ტერიტორიაზე ოდესმე არსებული სასტუმროების ჩამონათვალი;

·         საშუალო ნიხრი;

·         მონაცემები მოგზაურობაზე.

საბაზრო სეგმენტის შერჩევა მოღვაწეობისათვის

·         სრული მომსახურების;

·         შეზღუდული მომსახურების;

·         გრძელვადიანი ვიზიტებისთვის;

·         ლუქსის ტიპის;

·         საშუალოფასიანი;

·         ეკონომ კლასის;

·         საბიუჯეტო.

სასტუმროსათვის შესაფერისი დიზაინის შერჩევა

·         მაღალსართულიანი;

·         საშუალო სიმაღლის;

·         აპარტამენტები მიმდებარე ბაღით;

·         შერეული დიზაინის.

სასრუმროსათვის შესაფერისი ბრენდის შერჩევა

·         ფრანჩიზა („მერიოტი“, „შერატონი“ და ა.შ.);

·         ლიცენზია;

·         დამოუკიდებელი;

·         დამოუკიდებელი, რომელიც დამოკიდებულია სტრატეგიულ ბაზარზე.

10-წლიანი პროექტი

·         ყოველწლიური საქმიანობის პროექტი;

·         ვალის დასაფარი თანხის განსაზღვრა;

·         ინვესტორებისათვის დასაბრუნებელი თანხის განსაზღვრა;

·         ერთიანი შემოსავლის განსაზღვრა;

·         ინვესტიციების ამოღების დაგეგმილი გრაფიკი;

·         პროექტის ათწლიანი ღირებულება.

პროექტის მიზანშეწონილობის შესწავლის შემდეგ დეველოპერი ყიდულობს შესაბამის მიწის ნაკვეთს.

მესაკუთრე ორგანიზაციის შექმნა

მესაკუთრე ორგანიზაცია (ყურადღება მიაქციეთ, რომ მესაკუთრე ორგანიზაცია დეველოპერული კომპანია არაა), ჯერ მიწისა და შემდგომში უკვე აშენებული სასტუმროს მესაკუთრეობისათვის იქმნება. ინვესტორთა ფინანსური ვალდებულებებიდან, ადგილობრივი საგადასახადო კანონმდებლობიდან, უძრავი ქონების მფლობელის პოტენციური მოთხოვნებიდან გამომდინარე, როგორც წესი იქმნება:

·         შეზღუდული პასუხისმგებლობის საზოგადოება (LLC);

·         ამხანაგობა (LP);

·         კორპორაცია.

შეთანხმება განვითარებაზე

ახალდაფუძნებული ორგანიზაცია დეველოპერულ კომპანიასთან აფორმებს შეთანხმებას პროექტის განხორციელების თაობაზე. როგორც წესი, დეველოპერული კომპანია გაწეული მომსახურებისთვის გასამრჯელოდ პროექტის სრული ღირებულების 3% იღებს. ასეთი შეთანხმება შეიძლება მოიცავდეს:

·         არქიტექტორებისა და მშენებლების შერჩევას;

·         გენერალური კონტრაქტორის შერჩევასა და მასზე ზედამხედველობას;

·         მშენებლობაზე ნებართვების აღების პროცედურის განხორციელებას;

·         ინვესტორებისაგან თანხების მოზიდვას;

·         ფრანჩიზორი კომპანიის შერჩევას;

·         ფრანჩიზორთან შეთანხმებას;

·         ფრანჩიზორის მოთხოვნების შესაბამისი ინტერიერის დიზაინერის შერჩევას;

·         ავეჯისა და სხვ. მოწყობილობების შეძენას;

·         სასტუმროს სამართავად მენეჯერული კომპანიის შერჩევას;

·         დანახარჯის განსაზღვრას.

ფრანჩიზორის შერჩევა

ასაშენებელი სასტუმროს ტიპის მიხედვით დეველოპერი შესაფერის ფრანჩიზორს არჩევს. ყველა ფრანჩიზორს თავისი მოთხოვნები და ფასები აქვს. ფრანჩიზორის შერჩევისას დიდი მნიშვნელობა აქვს კონკრეტულ ბაზარზე უკვე არსებული ბრენდებისა და მათი პირობების შესწავლას.

არქიტექტორის შერჩევა

უდიდესი მნიშვნელობა აქვს არქიტექტორის გამოცდილებას სასტუმროების მშენებლობის საქმეში და მისი ნამუშევრების შესაბამისობას ფრანჩიზორის მოთხოვნებთან. აშენებული ნაგებობა სრულიან უნდა მიესადაგებოდეს სასტუმროს მოთხოვნებს და თავისებურებებს. არქიტექტორის მომსახურების საფასური სასტუმროს მშენებლობის ღირებულების 5 %–ს შეადგენს.

გენერალური კონტრაქტორის შერჩევა

ასევე, უდიდესი მნიშვნელობა აქვს გენერალური კონტრაქტორის გამოცდილებასა და რეპუტაციას. გასათვალისწინებელია გენერალური კონტრაქტორის ქვეკონტრაქტორი ფირმების საიმედობის საკითხიც. უმნიშვნელოვანესია კონტრაქტორის გამოცდილება კონკრეტულად სასტუმროების მშენებლობის საქმეში. სასტუმროს მშენებლობის პროცესში გაუთვალისწინებელი ხარჯები 10%–ის ფარგლებში მერყეობს.

პროექტის დაფინანსება

პროექტის დაფინანსებისას აუცილებელია  შემდეგი საკითხების განსაზღვრა:

·         მიწის ღირებულება;

·         შენობა–ნაგეგობათა დიზაინისა და მათი მშენებლობის ღირებულება;

·         ავეჯისა და აღჭურვილობის ღირებულება;

·         წინასწარი სამუშაოების ხარჯები;

·         გახსნიშ შემდგომი 6 თვის ხარჯებისთვის სარეზერვო თანხები.

სწორედ ამ ინფორმაციაზე დაყრდნობით ხდება 10–წლიანი წინასწარი ბიუჯეტის შედგენა და იწყება მშენებლობისათვის აცილებელი სახსრების მოძიება. სამშენებლო სეხსის პირობები მთლიანად კრედიტორზეა დამოკიდებული. სეასხის პირობებზე გავლენას ახდებს ისეთი მნიშვნელოვანი დეტალები, როგორიცაა:

·         დეველოპერების და/ან ინვესტორების პირადი გარანტიები;

·         სესხის მომზადების საფასური;

·         საპროცენტო განაკვეთი;

·         ჩასესხების პირობები;

·         სესხის/მშენებლობის ვადები და ა.შ.

ეს არის იმ დეტალების მცირე ნაწილი, რომლის განხილვაც  აუცილებელია კრედიტორის შერჩევისას, რის შემდეგაც დეველოპერი პროექტის მეპატრონის სახელით მიმართავს რიგ საკრედიტო ორგანიზაციებს. ისინი კი თავის მხრივ, აანალიზებენ წინადადებას და საკუთარ პირობებს აყენებენ. როგორც წესი, კრედიტიტისთვის გამოყოფილი თანხა პროექტის საერთო ღირებულების 60%-ს  შეადგენს. დანარჩენ სახსრებს კი ინვესტორები უზრუნველყოფენ.

სახსრების მოზიდვა ინვესტორებისაგან

როგორც უკვე აღვნიშნეთ, სასტუმროს მშენებლობის 60%–ს კრედიტი შეადგენს დარჩენილ 40%–ს კი ინვესტორები დებენ. ინვესტიციის უზრუნველსაყოფად დეველოპერი არსებული სახელშეკრულებო სამართლის შესაბამის დოკუმენტაციას ამზადებს. შეზღუდული პასუხისმგებლობის საზოგადოების ან ამხანაგობისთვის შეთავაზების ცირკულარი და პროექტის აღწერილობა კეთდება.

და, მხოლოდ ამის შემდეგ უკავშირდება დეველოპერი დაფინანსების სავარაუდო წყაროებს:

·         კერძი ინვესტორებს;

·         კერძო აქტივების მართვის მენეჯერებს;

·         სხვადასხვა ფონდების მენეჯერებს.

პეტენციური ინვესტორები იღებენ შეთავაზებას სასტუმროში ფინანსების ჩადების თაობაზე. პროექტის, შეფასებების და ზემოთ ჩამოთვლილი სხვა დეტალების შესწავლის შემდეგ წყდება ინვესტირების განხორციელების ან არგანხორციელების საკითხი. ფორმდება ხელშეკრულება გენერალურ კონტრაქტორთან, ავეჯისა და ტექსტილის მომწოდებელ ფირმებთან და ა.შ. ერთი სიტყვით,  მშნებელობა იწყება.

სამენეჯმენტო კომპანიის შერჩევა

წარმატების გარანტიისთვის აუცილებელია სამენეჯმენტო კომპანიის შერჩევა და აშენებული სასტუმროს მისთვის გადაცემა. ამიტომ, მას ხშირად მშენებლობის დაწყებამდე არჩევენ. სამენეჯმენტო კომპანიის მოვალეობაა სასტუმროს გახსნამდე წინასწარი ღონისძიებების დაგეგმვა, ჩატარება, მარკეტინგისა და გაყიდვების, პერსონალის შერჩევის, მათი ტრენინგისა და სასტუმროს გახსნასთან დაკავშირებული საკითხების მოგვარება და რასაკვირგველია, სასტუმროს მართვა მისი გახსნის დღიდან. მსგავსი მომსახურებისთვის სამენეჯერო კომპანიას, ჩვეულებრივ, სასტუმროს  შემოსავლის 3–5% მიაქვს.

ფნანჩიზული კომპანია თავად ფრანჩიზის განმხორციელებელს ანდობს ხოლმე სასტუმროს მართვას. მაგალითად, „მერიოტი“ ფრანჩიზას 20–წლიანი კონტრაქტით ყოველწლიური მოგების 50%–ის სანაცვლოდ გასცემს.

2. სასტუმროს გახსნის ხელოვნება და მეცნიერება

ოდესმე სასტუმროს გახსნაში მონაწილეობის მიღების შანსი თუ მოგეცათ, ხელიდან ნუ გაუშვებთ მას. სასტუმროს გახსნის პროცესი, მიუხედავად მისი სირთულისა და შრომატევადობისა, მასპინძლობის ინდუსტრიის ყველაზე საინტერესო ელემენტია. სასტუმროს გახსნაში უამრავი ადამიანი მონაწილეობს და ათასობით გადაწყვეტილების მიღება ხდება საჭირო, მაგრამ უმთავრეს როლს მაინც ოპერაციების პროექტის მენეჯერი ასრულებს, რომელიც გენერალური მენეჯერისა და მარკეტინგის დირექტორის შემდეგ მესამე კაცია სასტუმროში. მის მოვალეობებში შედის პროექტის შემდეგი ასპექტები:

·         შენობის პროექტისა და ნახაზების სპეციფიკაციების განხილვა;

·         ოთახის მაკეტის შექმნაში მონაწილეობა;

·         წინასწარი საშტატო განრიგის შედგენა;

·         წინასწარი ბიუჯეტის შედგენა;

·         აუცილებელი აღჭურვილობის ბიუჯეტის შედგენა;

·         შესყიდვებზე, დასაწყობებასა და მოწოდებაზე ზედამხედველობა;

·         ინტერიერის გრაფიკული პაკეტის ზედამხედველობა;

·         მესამე მხარე – გამყიდველებთან ურთიერთობა.

შენობის პროექტი

ოპერაციების პროექტის მენეჯერის საქმიანობა შენობის პროექტის არქიტექტურული ნახაზების შესწავლით იწყება. იგი უნდა დარწმუნდეს რომ შენობა ერთნაირად მორგებული იქნება სტუმრისთვისაც და პერსონალისთვისაც და შეესაბამება სასტუმროს სპეციფიკის ყველა მოთხოვნას. კურიერის სათავსო კარსა და ლიფტს შორის უნდა მდებარეობდეს და მკაცრად განსაზღვრული ზომის უნდა იყოს. თავისი სტანდარტები აქვს სასტუმროს სხვა ოთახებსაც: სასადილოს, რესტორანს, სეიფს, ფიტნესის დარბაზსა და ა.შ. აუცილებელია სასტუმროში ავეჯისა და სხვა ინვენტარის შეზიდვის პრობლემის გადაჭრაც, რაც რასაკვირველია უკანა შესასვლელიდან უნდა განხორციელდეს.

ოთახის მაკეტი

სტანდარტული ორადგილიანი ნომრის მაკეტი მთლიანად ასახავს ოთახის განლაგებას და ყოველ ნივთს თავისი ადგილი აქვს მიჩენილი: საწოლებითა და მინი ბარით დაწყებული და ტელევიზორითა და ტელეფონით დამთავრებული. ოთახის მაკეტის შედგენის მიზანია წინასწარ განისაზღვროს რამდენად მოხერხებული იქნება მისი მოწყობილობა კლიენტისთვით, ადვილად მოხერხდება თუ არა ოთახის დალაგება, კარგ ადგილას დგას თუ არა თითოეული ნივთი – ტელევიზორი, კარადა და ა.შ.

წინასწარი საშტატო განრიგის შედგენა

წასწარი საშტატო განრიგის შედგენა ყველა აუცილებელი პოზიციის განაწილებით იწყება. პოზიციების ჩამონათვალი განისაზღვრება თუ არა დგება ცხრილი თანამდებობების დასახელებით, სამუშაოს დაწყების თარიღით, სახელფასო განაკვეთით, ბონუსებით და სხვა საჭირო ინფორმაციით. წინასწარ საშტატო განრიგში გარკვევით ჩანს თითოეული თანამშრომლის სამსახურში აყვანის თარიღი და მისთვის გადახდილი გასამრჯელოს ოდენობა.

წინასწარი ბიუჯეტი

წინასწარ ბიუჯეტს ოპერაციების პროექტის მენეჯერი ადგენს და იგი სამი ძირითადი ნაწილისგან შედგება: მუშახელის ღირებულება – 40%; გაყიდვებისა და მარკეტინგის ხარჯები – 40%; სხვა ხარჯები – 20%. მუშახელის ხარჯები ავტომატურად გადადის ბიუჯეტში წინასწარი საშტატო განრიგიდან, გაყიდვებისა და მარკეტინგის ხარჯებში კი გაერთიანებულია რეკლამის, საზოგადოებასთან ურთიერთობის, მივლინებების და სხვ. ხარჯები. ბიუჯეტი სხვადასხვა გათვალისწინებული თუ გაუთვალისწინებელი ხარჯებით მრგვალდება. მაგალითად: სამუშაო ჯგუფისთვის ოფისის ქირა სასტუმროს აშენებამდე, კომუნალური გადასახადები და ა.შ. სასტუმროს გახსნის თარიღის ნებისმიერი მიზეზით გადადება წინასწარ ბიუჯეტში შესაბამის ცვლილებებს იწვევს. მაგალითად, გახსნის თარიღის გადადებისას მით უფრო დიდია დამატებითი ხარჯები რაც უფრო პატარა ვადაა დარჩენილი გახსნის დაგეგმილ თარიღამდე, იმიტომ რომ პერსონალის დიდი ნაწილი უკვე აყვანილია და ისინი გასამრჯელოს ღებულობენ.

აღჭურვილობა და მარაგი

ოპერაციების პროექტის მენეჯერის ყველაზე კომპლექსური და საპასუხისმგებლო  ასპექტი აუცილებელი აღჭურვილობისა და მოწყობილობების სწორად დაანგარიშებაში მდგომარეობს. როგორც წესი, რიგით ოთხვარსკვლავიან სასტუმროში ერთ სტუმარზე 8–10 ათას ამერიკულ დოლარს ანგარიშობენ. საჭირო ნივთების ჩამონათვალი კი ჩვეულებრივ 2 500 ერთეულისაგან შედგება და იმისდა მიხედვით ფულ–სერვისიანი საკურორტო ტიპისაა სასტუმრო თუ ქალაქის ცენტრში დგას იგი, ნივთების ჩამონათვალი მატულობს ან კლებულობს.

მაგალითად, ჩვეულებრივი ოთახისათვის საჭიროა საწოლი, ლეიბი, საბანი, სარკე აბაზანისთვის, კედლის სანათი, მაგიდა, სკამი, ტუმბო, ბალიშის პირები, ზეწრები, ტანსაცმლის კარადა, საკიდები, ფარდები, ფენი და ა.შ. დამლაგებლის ოთახისთვის კი ავეჯის გარდა აუცილებელია მტვერსასრუტი,  ხალიჩის შამპუნი, ჩვრები, ტილოები და ა.შ.

თავისი მოწყობილობა აქვს სამზარეულოს, რესტორანს, ფიტნეს ცენტრს და სასტუმროს სხვა ოთახებსაც.

როგორც ზემოთ აღვნიშნეთ, ოპერაციების პროექტის მენეჯერის მოვალეობაა მესამე მხარე – გამყიდველებთან ურთიერთობაც. მშენებლობის დაწყებიდან 6 თვეში ხანდახან შესყიდვის 500 ორდერზე მეტია ხოლმე გაცემული. მისი მოვალეობაა ინტერიერის გრაფიკაზე კონტროლიც – ამოწმებს სასტუმროში განსათავსებელი ყველა აბრის, წარწერისა თუ განცხადების გრაფიკასა და ტექსტს, განსაზღვრავს სად რა უნდა გამოიკრას. ოპერაციების პროექტის მენეჯერის მოვალეობაა შედაგინოს მესამე მხარესთან ურთიერთობის გრაფიკი და საჭირეოების შემთხვევაში მისცეს მათ სასტუმროში მუშაობის უფლება. მაგალითად: ინტერნეტის ან ტელექსელის დამიონტაჟება, კედელში ჩაშენებული ავეჯის დამონტაჟება და ა.შ. იგი ეხმარება ადამიანური რესურსების განყოფილებას კადრების შერჩევაში და აქტიურად მონაწილეობს პერსონალის ტრენინგებში. პერსონალის შერჩევის პროცედურა, როგორც წესი, გახსნამდე 6 კვირით ადრე იწყება,  3–4 დღის განმავლობაში გრძელდება და თითო პოზიციაზე მინიმუმ 5 კანდიდატს განიხილავენ.

გახსნის დღე

გახსნის წინა 72 საათი ყველაზე მაღალი აქტიურობითა და განსაკუთრებული ქაოსით გამოირჩევა – გვიანდება ავეჯის შემოტანა, ბოლო წუთას მოაქვთ ჭურჭელი რესტორნისთვის, ირკვევა რომ არ მუშობს თითქოსდა უკვე გამართული ინტერნეტი და ა.შ. ამ დროს დიდი და პატარა მუშაობს – ლაგდება ოთახები, ივსება რესტორნისა და ბარის საწყობი, იკიდება ფარდები და კედლის დეკორაციები, მიმდინარეობს მენიუში ჩამოთვლილი კოქტეილებისა და კერძების დეგუსტაცია.

გენერალური მენეჯერი გადაჭრის თუ არა წითელ ლენტს სასტუმროს გახსნის ნიშნად, ოპერაციების პროექტის მენეჯერის მოვალეობები სრულდება და იგი ახალ პროეტზე მუშაობისთვის ემზადება.